SurabayaFood.com - Informasi Tempat Makan di Surabaya

Assalamuallaikum Nyak, Babe, Ncang, Ncing... Ude lama juga sih kite-kite dari SurabayaFood.com pengen nyicipin nyang namanye makanan Betawi. Soalnye nyang namanye makanan Betawi tuh banyak juga macemnye dan khas juga lho... Makanya kagak pake lama dah, langsung aja nih Ki Lurah ame Pak Carik ngedatengin tuh nyang namanye Resto Kafe Betawi. Emang tuh Resto namanya Kafe Betawi nyediain makanan apaan...? Yaela... Namanya aje Kafe Betawi ya udah mesti kudu ngejual makanan Betawi dong... Gua sebul, miskin juga lu pade he he he he.....

Nih hari kite ngedatengin Kafe Betawi nyang ade di Grand City Mall, soalnya ade juga tuh nyang di Surabaya Town Square. Tempatnye asyik banget dah. Suasananye macem rumah Gadang ame rumah Joglo Betawi dah, tapi ini nyang ude ade sentuhan modern. Langsung aje dah kite liatin tuh buku menunya, setelah puas liat-liat akhirnye kite milih makanannya urut mulai hidangan pembuka sampe penutup. Biar kate makanannye Betawi juga tapi urutan makannye make caranye orang patut-patut nyang ude makan sekolahan luar negeri tuh

Hidangan pembuka jatuh di Rujak Juhi. nyang namanye Rujak Juhi tuh isinye aneka sayuran, kentang rebus ame mie lalu disiram ame saus kacang nyang rasanye kecut-kecit gurih, ya namanye pake kacang pasti ada rasa gurih-gurih yang khas gitu dah. Terus atasnye dikasih ama Juhi alias Cumi-cumi kering. Rasanya Juhi manis-manis gurih khas seafood.

Dicampurin semuanya dah mulai sayur sampe Juhi ame sausnye. Rasanya baru enak walaupum maap-maap kate nih, rasanye buat Ki Lurah ame Pak Carik terlalu kecut. Jadinye rasa gurih ame sedepnya rada ilang ketutup rasa kecut yang dominan.

Udah ame hidangan pembukanya, kite-kite mesen Soto Betawi. Ini mah hidangan nyang Betawi banget alias semue semue juga pade tau dah. Sotonye rasanye kagak kenceng-kenceng amat tapi tetep kerasa gurihnye, gurihnye nyang terutame kerna make minyak samin. Minyak samin ntuh minyak nyang dibuat ame lemaknye Onta. Biasanye sih makanan timur tengah nyang make tapi karena nyang namanya makanan Betawi ade pengaruh timur tengahnye ya dipake juga dah dah...

Main coursenye... Ceile..!!! Nasi Ulam ame Semur Jengki alias semur jengkol. Nasi Ulam tuh makanan khas Betawi yang bisanye dimakan buat sarapan. Nasi Ulam ade due jenisnye. Nasi Ulam Basah karena ntuh Nasi Ulam disirem ame kuah semur. Lalu ade Nasi Ulam Kering, nih nasi ulam kagak disirem kuah semur tapi dicampur ame serundeng terus nyang versinya Kafe Betawi serundeng campuran nasinya ditambahin lagi nyang namanye ikan teri kecil-kecil. Jadi tambah sedep aje dah... Selain itu lauknya masih ada semur tahu ame kentang yang kagak pake kuah ame su'un terus ade daun kemanginye. Semur jengkolnye manteb banget dah... Rasanye bumbunye kerasa banget. Terutame ntuh nyang namane gurihnye kemiri yang dipaduin ma manisnye kecap. Bener-bener manteb pake huruh "B"

Penutupnye rujak bebeg. Eits ngebacanya tuh huruf E-nya make caping. Itu juga makanan khas Betawi. Buah-buahan dibebek alias ditumbuk ampe setengah ancur terus dicampur ama saus campuran gule merah ama terasi, cabe ama ini nih... pisang batu. Rasanye ya pedes-pedes manis gurih gitu dah. Nyang khas dari rujak yang ntu ini ye carenye ngebuat nyang kudu dibebeg alias ditumbuk ame alu. 

Nah puas deh Ki Lurah ame Pak Carik ngerasain sedepnye ntuh nyang namanya makanan Betawi. Na... Temen-temen nyang pengen nyicicipin bisa ngrasain di Kafe Betawi buat ngrasain makanan Betawi nyang kumplit. Ude dah... Kite lanjut lagi nih jalan-jalannye. Sampe ketemu lagi ye. Asalammuallaikum dah semuenye...

Catatan redaksi: Dialek Betawi yang digunakan dalam tulisan ini adalah Dialek Betawi subdialek Jatinegara dengan kombinasi subdialek Kebayoran, Tambun